320 208 habitants en Corse au 1er janvier 2013, début d'une nouvelle campagne de recensement
(A redazzioni d'Alta Frequenza) - 320 208 abitanti in Corsica u 1a di ghjinnaghju di u 2013, trè anni fà dunqua, l'isula ferma sempri cusì attrattiva, è què malgradu una maghjina propiu pessima dipoi un certu tempu, è ùn pinsemi micca à l'evenimenti di a fin di l'annata 2015. Di manera paradussali, a regioni di Francia podassi a più mal vista da i media o ancu odiata da una certa stampa ferma quilla chì attrai u più. A Corsica ferma in fatti a regioni chì vedi a so pupulazioni crescia u più è ssa tindenza ricolla oramai à l'annu 2008. Dipoi ssa data in fatti, più di 17 000 parsoni sò ghjunti in Corsica, guasgi 6% pà i 5 anni è 1,11% annant'à un annu, u doppiu di a media naziunali. Nisun surpresa, sò i lochi i più urbanizati inghjiru à Aiacciu, Bastia è l'altri lucalità maiò induva i ghjunghjiticci sò prisenti u più suventi. Di una manera paradussali dinò, l'esodiu rurali cuntinueghja à sbiutà i picculi cumuni, quilli chì contani menu di 500 abitanti è chì sò luntanu da i grandi centri urbanizati. In u 1968 par asempiu, un abitanti nant'à quattru in Corsica campava in una cumuna di menu di 500 abitanti, hè solu oghji unu nant'à ottu. Hè cù ssi dati essenziali chì l'INSEE lancia a so campagna di censu pà l'annata 2016, un censu chì quist'annu hà da parmetta di quantificà i pupulazioni di 26 cumuni in Corsica Suttana è di 48 in Corsica Suprana. Quist'annu torna è pà fà crescia a tindenza arrighjistrata annu, u censu si farà soprattuttu grazia à internet. Si trattarà malgradu tuttu di un'azzioni vuluntarista di i citadini, ma l'INSEE farà tuttu pà affirmà ss'evuluzioni.
Steti à senta à Aude Lepidi, in carica di u serviziu Statistichi inde l'INSEE di Corsica.
Sur le même sujet
