A dix jours du référendum un sondage donne les indépendantistes écossais vainqueurs
(A redazzioni d'Alta Frequenza) - Ss'attualità ùn cuncerna micca a Corsica... Ma infini... Pà a prima volta in un sundami, l'indipendentisti scuzzesi sò à u primu postu, à deci ghjorni di u referendum chì hà da ditarminà s'è a Scozia devi ritruvà a so indipindenza, o s'ella devi frimà ind'u Reami Unitu, è dunqua liata à Londra. Ramintemi chì u 18 di sittembri, i Scuzzesi duvarani risponda à ssa dumanda chì farà l'avvena di u paesi nentru à l'Unioni Brittanica, o micca. In un sundami publicatu da u Sunday Time, u "iè" vinciaria oghji cù 51% di i voti. U scartu hè assai chjucu ed hè ancu sottu à a marghjina d'errori, ma a tindenza hè di manera chjara à prò di u Partitu naziunali di u Prima ministru scuzzesi, Alex Salmond. In fatti, un mesi fà, erani piuttosti l'unionisti chì erani davanti cù 61% di i voti. Oghji, più cà mai, l'indipindenza di a Scozia hè divintata una pussibilità. Aldilà di u risultatu, ssa tindenza dimostra a prugressioni assai impurtanti di i rivindicazioni indipendentisti, siparatisti è righjunalisti in Auropa in ssu mumentu. In fatti, u 9 di nuvembri, un referendum pà l'autoditarminazioni di a Catalogna hè statu dicisu da u parlamentu lucali, è contr'à l'avisu di Madrid. A Catalogna, chì t'hà dighjà un statutu d'autunimia dumanda dinò ella u dirittu di divintà una nazioni aurupea. Hè sicura chì i naziunalisti è autunumisti corsi suvitani da vicinu l'evuluzioni di i cosi pà ssi paesi aurupei membri di a cumunità aurupea.
