ACA-OM : ce que révèlent les caméras
Si cuntinuvighja a inchiesta in l’affari dittu di « Kenzo ». L’imagini di a videosurviglianza, trasmissi à i sirvizia di a inchiesta, facini veda parichji affari.
Una chì a mamma ùn c’era in a loghja, quand’iddu hè successu l’affari. In l’arrighjistramentu, si vidi ch’idda scontra i ghjovani quand’iddi n’escini.
À nantu à l’imagini, si vidini quattru ghjuvanotti entra in a loghja è escia ni calchì siconda dopu. Ci sò i tistimogni chì dani cunfirma chì, à issu mumentu, Kenzo è u so frateddu erani luntanu.
Ùn ni semu più à i primi dichjarazioni d’un ziteddu lampatu in tarra è minatu, è di a so maglietta brusgiata.
Certi parsoni, in i sirvizia di a inchiesta, rigretani a prissioni missa « da insù » à nantu à iss’affari.
L’affari, ghjustamenti, è u so trattamentu ghjudiziariu, si spera oramai ch’iddi si trattarani unicamenti arrimbendu si à i fatti, è micca suvitendu a infiarata di i reti suciali è a vulintà d’imbrutta un populu.
À issu sughjettu sempri, ci vurrà ancu à circà à capì comu i sustinidori marsigliesi, supposti inquadrati da i forzi di l’ordini finita a partita, ani pussutu piddà si ni à un ghjurnalistu di Via Stella è à i clienti d’una stazioni d’essenza.
È ci vurrà à spiicà ciò chì hè successu dui ghjorna innanzi è à a vighjilia di u scontru.
Ci vurrà infini chì a municipalità d’Aiacciu achi calchì risposta di u ministeru di l’internu, par spiicà a ghjunta di 800 sustinidori in Corsica, postu ch’idd’ùn s’era datu chè 450 piazzi. Parichji d’issi sustinidori, d’altrondi, ùn aviani mancu privistu alloghju.