Affaire Brun : le verdict
(A redazzioni d'Alta Frequenza) - Cundanni à a prighjoni ferma è attimpata : eccu ciò ch'ellu hà prununziatu ssu marti u tribunali currizziunali di Bastia in u prucessu contr'à Gilles Brun. L'anzianu elettu calvesi hè statu cundannatu à trè anni di prighjoni frà i quali dui attimpati pighjendu effettu subbitu. L'era rimpruvaratu malvirsazioni finanziarii supposti è presa micca legali d'intaressu. Hè accusatu d'avè acquistatu par asempiu un tarrenu municipali grazia "una parsona screnu", tarrenu ch'ellu avaria rivindutu u ghjornu stessu à u so fighjolu. Hè dinò accusatu d'avè uttenutu cù mezi difesi crediti è fattu falsi bigliettini di paga. Membri di a so famighja sò stati ghjudicati dinò. Sò stati cundannati da 18 mesi fin'è trè anni più o menu cù un'attimpera. Un nutariu, Maestru Ciavaldini, hè statu cundannatu pà contu soiu pà cumplicità à 2 anni frà i quali 18 attimpati. À a fin di ssu prucessu, ghjurnalisti di France 3 Corse sò stati agressati in i curridori. A direzzioni è a redazzioni d'Alta Frequenza cundannani ss'atti è sustenini i ghjurnalisti di France 3 è tutti i cumpagni agressati duranti l'eserciziu di i so funzioni.
