Affaire du drapeau corse sur la pelouse de Timizzolu : mise au point de la LFP
(A redazzioni d'Alta Frequenza) - Dopu à a pulemica inghjinnata da l'interdizzioni di a bandera corsa à l'intrata di i ghjucadori di a partita di Liga 2 AC Aiacciu-Valenciennes ssu vennari à u stadiu François Coty, u presidenti di a Liga di Ballò Prufiziunali, Frédéric Thiriez, hà vulsutu chjarificà certi affari. "A Liga ùn hà mai pruibitu è ùn pruibisciarà mai i banderi ind'i stadii, ch'elli sighini corsi, brittoni, baschi o ancu uccittani, prima, duranti, o dopu i partiti. Si tratta quì di a sprissioni di un'identità chì a Liga ùn hà nisun raghjoni d'impidiscia, à u cuntrariu", dici Frédéric Thiriez. "Inveci, c'hè bè un protocollu prima à a partita chì devi essa rispittatu, com'elli a facini a FIFA è l'UEFA. Ssu protocollu, chì dura trè minuti currispundendu à l'intrata di i ghjucadori ghjustu nanzi à u principiu di u scontru, devi essa u listessu annant'à tutti i stadii è pà tutti i squadri. Fora di ssu mumentu prutucullariu, c'hè dunqua tutta a piazza pà i banderi ind'i stadii di Liga 1 o di Liga 2", cuncludi u presidenti di a LFP.
