Affaire M'Boma : la mise au point du GFCO Ajaccio
(A redazzioni d'Alta Frequenza) - U Cumitatu Direttori di u Gazélec d'Aiacciu tinia stamani (marcuri) una cunfarenza di stampa, da fà cunnoscia a so pusizioni di pettu à una lita chì si hè passata dopu à u scontru GFCOA-Parighji FC, vennari scorsu in Mezavia. L'allenatori di a squadra franciliana Alain M'Boma saria, d'appressu à parolli stampati ind'un ghjurnali spurtivu naziunali, statu vittima di insulti razzisti è d'agressioni fisica, frà altru da u direttori spurtivu aiaccinu, Christophe Ettori, davanti à l'albergu duva ella stavia a squadra cuntinintali. Un principiu di lita pruvucatu, sicondu u GFCOA, da insulti di un ghjucadori parighjinu, Ibrahima Faye, contr'à Christophe Ettori ; M'Boma, vulendu difenda u so ghjucadori, si saria trovu mischjatu à iss'affari senza vulè la daveru. Mentri chì una lagnanza saria stata posta da u coach francilianu contr'à Christophe Ettori, u direttori spurtivu aiaccinu ellu, hà dicisu di "pighjà un certu rinculu", u tempu di a struzzioni aparta da a Federazioni Francesi di Ballò, cù cunclusioni chì sarani resi da quì à quindici ghjorni. Da u cantu di a squadra, issa lita essendu qualificata d'ordini privatu, hè nigata qualsiasi rispunsabilità, è omu ùn si senti mancu appena minacciatu da una cundanna spurtiva pussibuli. Da nutà frà altru chì, sempri d'appressu à a squadra aiaccina, a partita di vennari scorsu saria statu "incuraghjitu da l'atti di una squadra cuncurrenti di u GFCOA, pà cullà in Lega 2", chì avaria prupostu "primi impurtanti à quattru ghjucadori parighjini s'è a so squadra ci la facia à buscà si u risultatu à paru in Aiacciu", senza chì u "Parighji FC sighi mischjatu à issa pratica qui". U Gazélec ni chjama dunqua à a FFF, da fà chì "quissa quì fessi particularmenti casu nant'à u sfilà di i dui prossimi ghjurnati di i cuncurrenti diretti di u GFCOA".
Écoutez Olivier Miniconi, pour le Comité Directeur du GFCOA.
Sur le même sujet
