Affaire Nice-Bastia : le ministre de l'Intérieur ne veut pas en rester là
(A redazzioni d'Alta Frequenza) - U ministru di l'Internu, Bernard Cazeneuve, hà cundannatu oghji (luni) "evenimenti pessimi chì ùn si poni micca adimetta", sabbatu, dopu a partita Nizza-Bastia. Ss'ultimu voli chì l'inchieta inghjinessi azzioni in ghjustizia è interdizzioni amministrativi di stadiu. Ramintemi chì a sittimana scorsa, nanzi à a partita, u ministeru di l'Internu avia pruibitu u spiazzamentu di i sustenidori trà a Corsica è Nizza. A prifittura di l'Alpi Marittimi avia interditu pà contu soiu "di purtà, di tena o di ghjuvassi d'ughjetti o panni à i culori di u club di u SC Bastia". "In Nizza, dopu chì u tarrenu sighi statu invaditu, ci sò stati viulenzi di sustenidori lucali, mentri chì in Liò, una baruffa hà uppostu sustenidori di liunnesi contr'à quilli di Montpellier", hà insistutu u ministru in un cumunicatu. Sò "cumpurtamenti micca accittevuli chì ùn ani micca a so piazza ind'i lochi spuritivi nè vicinu à i so lochi". Pà Bernard Cazeneuve, ss'evenimenti pessimi "ghjustificheghjani di manera piena i misuri d'interdizzioni o d'inquadramentu assai siveru di spiazzamentu di sustenidori presi da i puteri publichi". Ramenta infini chì tutti l'attori di u mondu di u ballò, à u prima rangu quilli di i clubs, t'ani duveri à rispittà, da fà chì, particularmenti ind'u cuntestu di scontri à risichi, tutti i formi di pruvucazioni sighini sclusi cù forza".
