Affrètement du Pélican par l'OTC : la réponse de Paul-Marie Bartoli

(A redazzioni d'Alta Frequenza) - Prima d'asaminà sfarenti raporti à u prugramma di a seenza di l'assemblea di Corsica di ssu ghjovi, com'è quillu annant'à a pianificazioni pà a nurmalisazioni di a lingua corsa è u prugressu ver di una sucità bislingua, chjamatu Lingua 2020, l'eletti tarrituriali ani postu com'è sempri quistioni à bocca à l'Esecutivu di Corsica. Un sughjettu hè statu trattatu par asempiu, è micca u menu impurtanti à u nivellu puliticu, u finanziamentu di a mubilisazioni di u Pélican, grazia à una dumanda di u gruppu di diritta è di a cunsighjera tarrituriali Alexandra Pagni. Ramintemi chì a CTC, in privenzioni di muvimenti di greva pussibuli à a SNCM è par via d'arresti tennichi successivi di i trè cargò misti di a CMN, avia dicisu di nuvembri scorsu, grazia à l'Uffiziu di i Trasporti, di mubilizà un battellu, cunfidatu à u nivellu tennicu à a Méridionale. Una mubilisazioni cù un costu di 15 000 auri à ghjornu, chì hè durata 128 ghjorni, vali à dì dunqua in tuttu 1,9 millioni d'auri. Un sciffru sprupusitatu chì hà purtatu u gruppu liberali à dumandà s'è ssa mubilisazioni era stata finanziata annant'à a linea bughjettaria rilativa à i prublemi micca privisti di a Dilegazioni di Serviziu Publicu, è s'è ss'azzioni, s'elli ci duviani essa prublemi novi à u nivellu di a DSP, si pudaria ripruducia. Una dumanda di u gruppu Rassembler pour la Corsica chì hà avutu una riposta, quilla di u presidenti di l'Uffiziu di i Trasporti, Paul Marie Bartoli. Par ellu, ssa dicisioni di privenzioni era nicissaria, dopu à a greva difficiuli ind'u marittimu, chì avia toccu assai l'ecunumia corsa l'ultimu istati, è di pettu à a minaccia di cunflitti novi pussibuli chì, par via di a situazioni di a SNCM, pariani guasgi sicuri d'auturnu scorsu. Una mubilisazioni pà ssu battellu chì s'hè compia à a fin di marzu, finanziata in u 2014 da i crediti privisti da a DSP marittima, eppo da a linea di 11,5 millioni d'auri pà parà prublemi micca privisti ind'a dilegazioni di serviziu publicu in u 2015.

Steti à senta à Paul Marie Bartoli.