Alain Orsoni victime d'un malaise
(A redazzioni d'Alta Frequenza) - Alanu Orsoni hè statu vittima di una mancanza issu dopu meziornu (luni) in Veru. U so medicu hè andatu sopralocu, ma u presidenti di l'AC Aiacciu hà ricusatu qualsiasi cura o uspitalisazioni. U duttori Testou l'hà cunsighjatu cù forza di piantà a so greva di a fami, parchì u so statu di saluta pudaria veramenti divintà criticu da quì à 24 o 48 ori. Da nutà, frà altru, chì u dibattitu cuntradittoriu trà a difesa di Guy Orsoni è u ministeru publicu marsighjesu s'hè fattu oghji (luni) ind'a prighjò di i Baumettes. U statu di saluta di Guy Orsoni, ùn li parmittia micca di spiazzà si da essa intesu ind'un antru locu. Issu dibattitu tuccava à u rinnovu micca rializatu di u mandatu di dipositu di u ghjuvanottu. Quissu quì cumpiendu u 14 d'aprili, dopu à un annu sottu à i marchjoni, ministeru publicu è difesa ani missu in avanti i so argumenti. A dicisioni sarà resa vennari à 5 ori. Un'altra prucedura si farà inde issu cartulari. Si tratta di un appellu di un'urdunnanza di rimissa in libertà chì sarà asaminata issu marcuri davanti à a camara di struzzioni. L'avucati di Guy Orsoni ani prupostu pà u so clienti ch'ellu purtessi un braccialettu elettronicu, com'è guaranzia pà a ghjustizia.
