Aménagement du territoire: la justice bafouée, selon U Levante
(A redazzioni d'Alta Frequenza) - « In Corsica, u Statu và contr’à i dicisioni di ghjustizia ; dipoi parechji anni, u Statu hà parmissu di custruiscia nant’à lochi ricunnisciuti com’è zoni duva ùn si pò micca custruiscia da i tribunali ; a residenzialisazioni di a Corsica hè dunqua, dipoi parechji anni, a strategia di u Statu pà a Corsica ». Eccu u titulu sanu sanu di u ducumentu datu vennari scorsu, micca à François Hollande, ma à unu di i so cullaburatori vicini duranti u passaghju di u presidenti in Aiacciu. Ss’accusazioni, assai gravi è chì t’hà un sensu maiò à u mumentu chì a Corsica pensa cun attinzioni è timori à u so avvena, hà di manera curiosa, ma sarà daveru un azardu, rimbubatu pocu pocu ind’i media. Appughjendu si nant’à ducumenti è una cartugraffia, l’associ di u cullettivu Littoral ani fattu cunnoscia à u Statu, o à i so funziunarii i più alti in tutti casi, ciò ch’elli cunsidareghjani com’è una trasgressioni à ciò ch’ella dumanda cù forza Christiane Taubira, ministra di a Ghjustizia : « Semi ind’un Statu di dirittu è i reguli s’imponini ; s’imponini à i povari, s’imponini à i ricchi, s’imponini à i debbuli, s’imponini à i putenti. » È a dichjarazioni di Martin Tomasi, l’avucatu di u cullettivu, à a fin di l’intrattenu, s’imponi dinò.
Steti à senta à Martin Tomasi.
