Annonces de Bernard Cazeneuve : la réaction d'Etienne Bastelica

(A redazzioni d'Alta Frequenza) - I riazzioni ùn sò micca famosi in Corsica dopu a visita di dui ministri, è micca i menu impurtanti cuncirnendu l'affari chì ci intaressani, quillu di l'Internu è quilla di a Dicintralisazioni. A parolla "chiche", prununziata da Bernard Cazeneuve duranti u so discorsu davanti à l'assemblea di Corsica, duvaria firmà stampatu ind'i menti. Prununziata pà rida, ssa parolla, pricisemula, pò avè altri sensi cà quillu ch'ellu hà vulsutu dà u ministru di l'Internu. "Chiche", hè dinò "rancicu", "manigranchju", "micca troppu generosu" ed hè cusì chì parechji ani percepitu u discorsu ministiriali in Corsica. In fatti, Bernard Cazeneuve hà dittu ch'ellu si pudaria scriva ind'a legi NOTRe di l'urganisazioni tarrituriali nova di a Republica un amendamentu chì pudaria parmetta di crià a Cullittività Unica in Corsica è què in un tempu assai cortu di trè anni. Puntu impurtanti, ed hè a sola manera d'andà in furia : u referendum vulsutu d'una manera cusì forti da eletti numarosi in Corsica, ùn parmittaria micca di suvità ssu calendariu. U ministru hà rinviatu dunqua l'assemblea di Corsica davanti i so rispunsabilità : sia scegli di crià ssa cullittività unica in un tempu assai cortu, sia ssa riforma hè rimandata à assai più tardi è integrata à riforma più glubali di u statutu di a Corsica. Emi arrighjistratu parechji riazzioni com'è quilla di Paul Giacobbi chì hè cuntentu di sicuru di a rapidità di a dimarchja intrapresa, quilla di Jean Charles Orsucci, u presidenti di u gruppu maghjuritariu à l'assemblea di Corsica, è quilla più cuntrastata di Laurent Marcangeli, diputatu di Corsica Suttana. I dui gruppi naziunalisti ùn sò mancu appena cuntenti, amintendu una riforma micca cumpletta, chì hè assai assai luntana da i so spiranzi. U gruppu Communistes et Front de Gauche hè assai cuntentu di u dialogu in corsu trà u guvernu è i raprisintanti di a CTC. Eppuru, ùn cambia mancu appena di parè annant'à ssa famosa cullittività unica è soprattuttu annant'à a sparizioni di u referendum pà pudecci ghjunghja.

Steti à senta à Etienne Bastelica, u so presidenti.