Annulation totale du PLU d'Ajaccio : réaction de Simon Renucci
(A redazzioni d'Alta Frequenza) - U tribunali amministrativu di Bastia hà dunqua annulatu stamani (marti) di manera sana u pianu lucali d'urbanisimu d'Aiacciu vutatu u 21 di maghju di u 2013. Hà suvitatu i dumandi di u rapurtadori publicu chì u 20 di nuvembri dumandava l'annulazioni tutali di u ducumentu d'urbanisimu pà "assenza di cuncertazioni ind'a siconda fasa" è "assenza di cumunicazioni à u cunsighju municipali di a nota spiecazioni di sintesi". S'è a Cità d'Aiacciu t'hà 2 mesi pà fà appellu, quissu quì ùn hè micca suspensivu, è a pudarà fà solu dopu à l'alizzioni municipali di ghjinnaghju è farraghju di u 2015. Aspittendu què, si volta dunqua à u Pianu d'occupazioni di a tarra di u 1999 è si manda à caternu guasgi tutti i prughjetti immubiliari maiò è a custruzzioni di parechji strutturi publichi. Dura lex, Sed lex! Duvariani mughjà tutti quilli, di diritta, di manca, naziunalisti, camari cunsulari, sindicati prufiziunali, chì dipoi parechji sittimani facini ricullà inchietudini assai forti annunziendu una vera catastrofa ecunomica pà Aiacciu è i so lochi. Simon Renucci credi sempri ch'ella pudarà cambià a sorti in tutti i casi.
Steti à senta à Simon Renucci, anzianu merri d'Aiacciu.
Sur le même sujet
