Antoine Santucci abattu hier soir à Penta Acquatella en Haute-Corse
(A redazzioni d'Alta Frequenza) - A Corsica Suprana hà cunnisciutu arisera (ghjovi) un novu assassiniu. Antoine Santucci, 63 anni, hè cascatu sottu à i balli di unu o parechji tiradori, quand'ellu vultava in casa soia in Penta Acquatella, in principiu di sirata. A vittima guidava a so vittura, quand'ella hè stata tomba, vicina à a piazza à a ghjesgia. Una siconda parsona hè stata ferita di modu gravi da issi stessi sparati. Hè Nicolas Teodorescu, un abitanti di a cumuna. Hè statu traspurtatu ver di l'uspidali di Bastia, duva u so prunosticu vitali hè ingaghjatu. Malgradu tuttu, i circustanzi di issa nova azzioni fermani difficiuli à cunnoscia. I dui omi ùn erani micca insemi duranti i fatti. L'inchiestadori si dumandani in fatti quali hè chì duvia essa toccu u primu. Ci era una mira solu,è a siconda parsona hè stata tocca o tomba vulendu purtà succorsu à a prima, divintendu di u colpu un testimoniu disturbanti? Tutti l'ipotesi fermani pussibuli. I soli cosi chì i servizii d'investigazioni è di u ministeru publicu sò pussuti pricisà, hè chì Antoine Santucci è Nicolas Teodorescu ùn erani micca cunnisciuti da i servizii di pulizza. Hè a sezzioni di ricerca di a gendarmeria chì hè in carica di l'investigazioni.
