Arrêté Miot: la demi-surprise de Pierre Chaubon
(A redazzioni d'Alta Frequenza) - U colpu minatu da u Cunsighju custituziunali, parsoni chì passani sopr'à u votu demucraticu di un'assemblea naziunali, hà da dà un soffiu novu à u prughjettu glubali pà a Corsica ? Certi, sò di più in più numarosi, à essa d'accunsentu cù st'idea quì. Ghjudicatu com'è cuntrariu à a Custituzioni, u famosu articulu di a legi di finanzi 2014 mandendu oramai à caternu u so statutu dirugatoriu nant'à i diritti di successioni, avarà fattu cunnoscia mumenti diversi torna una volta à un'isula è una pupulazioni assai attenti à ssu gennaru d'evuluzioni. Ùn saria micca un bè infini! Senza cuntintà si di a pulitica di u peghju, pari bè chì u fattu di vulè arrigulà i prublemi di a Corsica, quissu quì hè un asempiu à mezu à tanti altri, cù u mezu amministrativu, rigulamentariu è legislativu attuali sighi impussibuli. L'idea chì ci voli à ghjunghja dunqua à una riforma custituziunali chì daria daveru à a Corsica a pussibilità d'arrigulà i so prublemi camina à pocu à pocu. Sempri annant'à ssu sughjettu, ed hè appena una surpresa, Pierre Chaubon ùn hè micca surpresu tutalmenti, è mancu appena dillusu da ssa siconda sanzioni di u Cunsighju custituziunali. U presidenti di a cumissioni di i cumpetenzi legislativi è rigulamentarii di l'assemblea di Corsica è Antoine Orsini u presidenti di a cumissioni di i finanzi di a listessa assemblea tirani tutti i cunclusioni di ss'avenimentu novu. D'appressu à elli, ssu colpu di frenu, ssa spiranza dillusa faci chì a cumissioni hè rassicurata pà ciò chì tocca à i so racumandazioni prisenti ind'i so cunclusioni: a Corsica pudarà uttena dispusizioni dirugatorii, qualsiasi u nivellu, solu grazia à un cambiamentu di a Custituzioni.
Steti à senta à Pierre Chaubon.
Sur le même sujet
