Attentats de Paris : appel à la sérénité et à la vigilance du préfet de Corse
(A redazzioni d'Alta Frequenza) - Dopu à l'attentati tragichi di Parighji vennari à sera, chì ani vistu mora 129 parsoni è parechji centunai di feriti, i prifetti di Corsica Suttana è di Corsica Suprana, com'è quilli di l'altri dipartimenti francesi, ani adunitu sabbatu cù i prucuratori di a Republica i stati maiò di securità. In u quadru di u statu d'urghjenza dicisu da u Presidenti di a Republica, parechji misuri sò stati missi in opara : u rinforzu di a prisenza di i servizi di securità (pulizza naziunali, gendarmeria naziunali, dugani, forzi armati), l'annulazioni di i surtiti sculari cù trasporti publichi, a survighjenza rinfurzata di i lochi publichi, di i siti sinsibuli è di i stabilimenti chì ricevini u publicu è u cuntrollu rinfurzatu di i porti, di l'aeruporti è di i gari. U ditagliu di ssi misuri hè statu prisintatu da i dui prifetti à i parlementarii, à u presidenti di l'Esecutivu di Corsica, à u presidenti di l'Assemblea di Corsica, à i presidenti di i cunsighji dipartimintali è à l'associ dipartimintali di i merri. Par avà, i manifistazioni publichi (spittaculi, evenimenti spurtivi, fieri...) fermani autorizati. Farani quantunqua l'ughjettu di misuri di securità particulari. Un dolu naziunali hè statu dicisu fin'è dumani (marti) inclusu. I banderi ùn svintuleghjani micca annant'à l'edifizi publichi fin'è ssa data quì. Una minuta di silenziu sarà rispittata in Francia sana oghji à meziornu, sarà u casu dinò davanti a prifittura di Corsica in Aiacciu. In ssu cuntestu strasurdinariu, l'autorità racumandani à tutti di fà casu di una manera particulari, ancu s’è u risicu ùn pari micca u listessu di pettu à l’Ile de France.
Steti à senta à Christophe Mirmand, u prifettu di Corsica.
Sur le même sujet
