Avancées institutionnelles: premier rendez-vous avec le gouvernement ce vendredi à Paris
(A redazzioni d'Alta Frequenza) - Eri dopu meziornu (dumenica), Corsica Libera urganizava a so Ghjunta, chì hà adunitu i dilegati di i sizzioni di l'isula sana. Dopu avè parlatu di a tematica di l'alizzioni municipali, eccu oramai l'altru puntu maiò chì hè statu ammintatu duranti ssa riunioni: u primu appuntamentu di ssu vennari u 22 di nuvembri in Parighji trà eletti di l'Assemblea di Corsica è di u guvernu pà dibatta di i sfarenti avanzati istituziunali pussibuli pà l'isula. Ss'appuntamentu hà da parmetta di metta in ballu un calendariu di travaghju pricisu inghjiru à i cartulari maiò di a Corsica, com'è a riforma istituziunali, u statutu di cuufficialità di a lingua corsa, quillu di residenti, o ancu a fiscalità. Sò l'eletti di a Corsica chì ani lampatu una chjama, ed hè a prima volta, à u guvernu nant'à una dumanda pricisa arrimbendu si à raporti numarosi è voti acquistati cù una maghjurità bellissima à l'Assemblea di Corsica pà metta in piazza in dialogu custruttivu. Un mumentu ditarminanti pà l'avvena istituziunali di l'isula chì tuttu ognunu devi cunsidarà cù u valori chì hè u soiu, com'è a ci dici Josepha Giacometti, cunsighjera tarrituriali Corsica Libera.
Steti à senta à Josepha Giacometti.
