Avenir de l'agriculture corse : le plan de l'ODARC

(A redazzioni d'Alta Frequenza) - Sissioni nova ssu vennari pà l’Assemblea di Corsica cù in u prugramma par asempiu u dibattitu d’urientazioni bughjettarii. Un dibattitu aspittatu, soprattuttu chì a maghjurità attuali avia dinunziatu  a sittimana scorsa u passivu lacatu da l’anziana maghjurità di 100 millioni d’auri. Una sissioni chì hè principiata cù un umaghju, à a dumanda di u presidenti di u gruppu Le Rassemblement, José Rossi. Una minuta di silenziu hè stata rispittata di fattu in mimoria à Robert Feliciaggi, anzianu presidenti di u gruppu di diritta Union Territoriale à l'Assemblea di Corsica, tombu u 10 di marzu di u 2006 in Aiacciu. I cunsighjeri esecutivu è tarrituriali ani participatu dopu è com'è semprià i tradiziunali dumandi à bocca. Una di ssi dumandi hè stata posta da u cunsighjeru tarrituriali Front National, Christophe Canioni, cuncirnendu l'avvena di l'agricultura corsa. Di pettu à i difficultà ch'ellu cunnosci u mondu agriculu, soprattuttu nant'à l'isula, quissu quì vulia sapè s'è l'ODARC, pà ciò chì tocca a pulitica ch'ellu voli metta in ballu, t'hà i mezi nicissarii di pettu à i so ambizioni. Chì sò i mezi finanziari à a dispusizioni di l'Uffiziu ? Sarà pussibuli di cuntà nant'à l'istituzioni bancaria pà l'aiutu à a stallazioni di i ghjovani agricultori ? Chì mezi pà francassi à l'avvena di ritardi novi di pagamenti à l'agricultori ? Intarrugazioni numarosi di u cunsighjeru tarrituriali FN, ramintendu dinò u cuntestu internaziunali è a minaccia di u trattatu transantlanticu di scambiu libaru trà i Stati Uniti è l'Unioni Aurupea. À ssa dumanda di u cunsighjeru tarrituriali FN, u presidenti di l'ODARC ci hà rispostu à parechji nivelli. À u cuntrariu di ciò ch'ellu hà dittu Christophe Canioni, d'appressu à François Sargentini, l'agricultura corsa è l'agricultura cuntinintali ùn poni essa paragunati, parchì sò assai diffarenti. Una agricultura isulana chì ùn hà mai avutu u sustegnu nicissariu à u so sviluppu da a parti di u Statu, hà incalcatu u presidenti di l'ODARC. In leia cù u prugramma ch'ellu avia missu in risultatu appena dopu essa ghjuntu à ssu postu, François Sargentini hà cunfirmatu torna u rinnovu di l'arnesi è l'attribuzioni di mezi in più à l'agricultroi è l'allivadori di Corsica, parlendu par asempiu in u quadru di u Prugramma di Sviluppu Rurali di a Corsica, un vulumu d'investimentu di 30 millioni d'auri pà i cinqui anni chì venini.

Eccu un strattu di l'intarvinzioni di u presidenti di l'ODARC.