Baisse des fonds européens : une contre-vérité pour Paul Giacobbi
(A redazzioni d'Alta Frequenza) - À a fin di a sittimana scorsa, u diputatu aurupeu François Alfonsi facia cunnoscia i so inchietudini di pettu à una calata di i mezi dati da l'Unioni Aurupea à a Corsica, frà altru annant'à i dutazioni di u FEDER è di u FSE da u 2014 à u 2020. Una cumunicazioni chì hà fattu riagiscia Paul Giacobbi, u presidenti di l'esecutivu di Corsica. Quissu quì hè chjaru : dì chì a Corsica t'avarà menu soldi aurupei annant'à ssu tempu hè propiu falsu. Paul Giacobbi, chì farà un raportu à l'eletti tarrituriali, dici chì s'ella ci sarà bè una calata di u FEDER è di u FSE, quissa quì sarà inferiori à a crescita di a dutazioni di u FEADER pà a Corsica, FEADER chì agisci à prò di u sviluppu rurali. D'appressu à sciffri dati da a Cullettività Tarrituriali di Corsica, mentri chì u FEDER duvaria passà da 150 à 105 millioni d'auri, u FEADER passaria ellu da 93 à 145,3 millioni d'auri, vali à dì una crescita di 56,2%, mentri chì u FEAMP è u latu FEDER dittu Italia - Francia marittima duvariani essa stabuli. Sciffri chì lacariani spuntà tandu, infini, una crescita lighjera di i mezi glubali dati da l'Auropa.
Steti à senta à Paul Giacobbi.
