Budget primitif CTC 2015 : toute petite augmentation malgré un contexte difficile
(A redazzioni d'Alta Frequenza) - 934,360 millioni d'auri, par piacè ! Sarà dunqua u bughjettu primitivu pà l'annu 2015 asaminatu da l'Assemblea di Corsica à partasi di dumani (ghjovi). Un bughjettu chì malgradu un cuntestu difficiuli - a calata di i mezi dati da u Statu si cunfirmeghja - cunnosci una piccula crescita di 0,15%, ciò chì dimostra una vulintà di cuntinuà malgradu tuttu l'investimenti. Un bughjettu cù a voglia dinò di riducia i spesi, di l'agenzi è uffizii dinò, mantinendu à tempu u fattu d'ùn crescia micca a prissioni fiscali. Senza entra inde l'analisi sana di un ducumentu bughjettariu cumplessu di sicuru è impussibuli à trattà quì, si pò cità quantunqua a spartera di i grandi categurii di ssu bughjettu. I trasporti, qualsiasi i settori, aerei, marittimi, stradali è di u caminu di farru "pighjani" più di 285 millioni d'auri, vali à dì 46% di quissu quì. U carattaru isulanu di a Corsica hè accertatu quì cù ssu sciffru simplici. Suvitani dopu da u più à u menu impurtanti i servizi generali cù 15% di u bughjettu, l'insignamentu è a furmazioni prufiziunali, cù 11% tramindui, l'accunciamentu di u tarritoriu è u sviluppu durevuli raprisentani dinò 11%. Tutti l'altri posti, a cultura, u patrimoniu, u sviluppu ecunomicu sò sottu à 10%. Ùn c'hè più soldi, Paul Giacobbi hà spesu tuttu! Accusazioni micca fundata o rialtà?
Steti à senta à Paul Giacobbi, u presidenti di l'Esecutivu annant'à ssa quistioni particulari.
