Budget primitif de la ville d'Ajaccio devant le conseil municipal: la réaction de Stéphane Sbraggia
(A redazzioni d'Alta Frequenza) - O sgiò merri, ch’aveti fattu di i nostri soldi ? L’infrasata hè vultata arisera (ghjovi) com’è un leitmotiv duranti a riunioni di u cunsighju municipali d’Aiacciu chì duvia asaminà u so bughjettu primitivu pà l’annu 2013. Una riunioni duva si pudia senta una certa tinsioni dighjà priparata da i dui partiti à l’uccasioni di cunfarenzi di stampa dati calchì ghjornu, o calchì ora, nanzi à issu famosu dibattittu. Si pò bè parlà di dui lati specifichi di pettu à pusizioni dimustrati arisera da a maghjurità è da l’uppusizioni propiu furmali è secchi. Un bughjettu micca sinceru ! Issi dui parolli ani riisciuti à fà schjattà l’affari è ani ancu purtatu a maghjurità à dumandà scusi, scusi chì ùn vinarani micca. Prublema pà l’aiaccini chì duvarani eleghja un antru annu un novi merri, ci hè oramai nant’à a piazza publica dui analisi di a situazioni finanziaria di a cità, una chì prisenti issu bughjettu 2013 com’è unestu è curaghjosu, l’altra qualifichendu lu di « micca sinceru ». Ferma un mezu solu pà u simplici citadinu pà fà si un'upinioni ghjusta di l'affari: arrimbà si nant'à l'avisu di una ghjuridizzioni chì saria propiu senza parzialità, u tribunali amministrativu. Hè l'avisu purtatu cù forza arisera da a maghjurità cumunali, un avisu ricusatu più cà mai da l'uppusizioni. Eppo l'affari divintaria guasgi sicundariu, ma issu bughjettu hè stata aduttatu quantunqua da una maghjurità assai larga; quattru voti soli di u gruppu di diritta ani dittu d'innò in fatti cù un votu negativu. Un bughjettu à l'ingrossu di 120 millioni d'auri; guasgi 75% sò cunsacrati à u funziunamentu è 25% dunqua à l'investimentu.
Ecoutez Stéphane Sbraggia, pour le groupe d'opposition Union pour Ajaccio.
