Cas de Paul-André Contadini : l'Associu Sulidarità exhorte l'Etat d'agir
(A redazzioni d'Alta Frequenza) - Parechji centunai di parsoni si sò aduniti davanti i prifitturi d'Aiacciu è di Bastia ssu sabbatu dopu meziornu à a chjama di l'Associu Sulidarità; a Liga di i Diritti di l'Omi di Corsica ci hà participatu dinò. Un'adunita di sustegnu à Paulu Andria Contadini, prighjuneru puliticu incarceratu in Fresnes, chì hà principiatu u 15 di sittembri una greva di a fami è persu da tandu 12 chilò. U prighjuneru, chì dumanda u so avvicinamentu in Borgu, hè statu uspitalizatu d'altrondi ssu vennari, postu chì a so saluta hè impeghjurita assai. Davanti a prifittura di Corsica, Ghjuvan Maria Poli, u presidenti di l'Associu Sulidarità, hà dinunziatu l'attitudini di u Statu in ssu cartulari è interpellatu a ministra di a Ghjustizia è u Presidenti di a Republica da fà chì, di manera più generali, tutti i prighjuneri pultichi corsi ritruvessini i so diritti. L'uccasioni dinò di dumandà più cà mai l'annistia di i prighjuneri è di i ricircati pulitichi. L'Associu Sulidarità hà annunziatu infini chì, à partasi di ssa dumenica, aduniti davanti i prifitturi di i dui dipartimenti sariani urganizati ogni sera, fin'tantu chì u casu di Paulu Andria Contadini ùn sarà micca arrigulatu. Da un'antra banda, Ghjuvan Pasquale Cesari hè statu libaratu pà contu soiu ssu vennari par via di a so saluta è ubligatu à stà in Parighji. Intervista di Ghjuvan Maria Poli da ritruvà in i nostri nutiziali chì venini.
Sur le même sujet
