Catastrophe de Furiani : Karim Zeribi en faveur d'une sanctuarisation du 5 mai
(A redazzioni d'Alta Frequenza) - Sò 22 anni oghji (luni) chì a tribuna Nordu di u stadiu Armand Cesari, custruita à l'infuria, si n'hè falata à calchì minuta di u principiu di a meza finali di a Cuppa di Francia di ballò trà u SC Bastia è l'Olympique di Marseghja. Ssu 5 di maghju di u 1992, a festa s'hè trasfurmata in castastrofa. Diciottu parsoni sò morti è parechji millai sò stati feriti. È mentri chì 22 anni dopu à ssa tragedia, u cullettivu si batti sempri da fà chì più nisun scontru sighi ghjucatu in Francia un 5 di maghju, ciò chì sarà torna u casu oghji in Lega 2, com'è ogni annu, ci sarani cumemurazioni. Prima, à 4 ori, davanti à a stela di u ricordu accantu à u stadiu, ci sarà una ceremonia, nanzi à una messa à 6 ori in mimoria di i vittimi in catedrali Santa Maria di Bastia. L'uccasioni di vultà annant'à i sustegni di ss'ultimi ghjorni à prò di a lotta di i vittimi è di i so famighji. Fora di i sustegni lucali, ci sò dinò sustegni à u nivellu naziunali, com'è quillu di i diputati chì ani firmatu a pruposta di legi pà a santuarisazioni di a data di u 5 di maghju in u ballò francesi, ma dinò, dipoi pocu, quillu di Karim Zeribi, diputatu aurupeu Europe Ecologie les Verts. In campagna in Corsica, è di manera più pricisa davanti à a stela di u ricordu calchì ghjornu fà, Karim Zeribi hè statu chjaru : più nisun partita devi essa ghjucata un 5 di maghju in Francia.
Steti à senta à Karim Zeribi, candidatu Europe Ecologie les Verts à l'alizzioni aurupei.
Sur le même sujet
