CCI2B et BTP2B proposent un plan pour sauver la filière BTP de Haute-Corse
(A redazzioni d'Alta Frequenza) - Un numaru di parmessi di custruiscia chì cala assai, un sciffru d'affari di più in più gattivu dipoi trè anni, sbilanci numarosi è centunai d'impieghi spariti, eccu i sciffri regiunali propiu pessimi missi in evidenza da i prufiziunali di u settori di u BTP in Corsica Suprana. In leia strategica cù a Camara di Cummerciu è d'Industria di Corsica Suprana, pruponini à i cullittività lucali un pianu pà pudè salvà a filiera BTP. È nentru à ssu pianu, ùn si tratta micca di dumandà di fà crescia di manera forti a dumanda publica à cortu andà, ancu s'ellu hè unu di i trè scopi à longu andà, ma piuttostu di vultà à tempi più nurmali pà pagà. In fatti, quandu l'intrapresi t'ani l'ubligazioni legali di pagà i so partinarii à u più tardi dopu à trenta ghjorni, i cullittività pagani suventi i travaghji rializati in media ind'i centu ghjorni, vali à dì chì l'intrapresi di u BTP devini pagà i so partinarii cù soldi ch'elli ùn ani micca. Di fattu, à mezu à i pruposti, c'hè a pussibilità pà i cullittività di passà pà imprestiti spiciali à tassu zeru pà pudè arragnà i tisurarii, calcosa chì si faci dighjà in altrò, com'è avanzi fin'è 30% di u prezzu di i travaghji.
Steti à senta à Dominique Antoniotti, u presidenti di a federazioni di u BTP in Corsica Suprana.
Sur le même sujet
