Centrale à Cycle Combiné Gaz d’Ajaccio : une vraie bonne nouvelle ?
(A redazzioni d'Alta Frequenza) - Eccu ! U prughjettu di Cintrali à Ciculu Cumbinatu Gaz d'Aiacciu hè lanciatu di manera ufficiali. Una Dichjarazioni d'intenzioni cumuni rilativa à quissu quì hè stata firmata ssu ghjovi da mani da u prifettu di Corsica, u presidenti di l'Esecutivu di Corsica, ma dinò u diputatu è merri d'Aiacciu, u presidenti di a CAPA, u direttori regiunali d'EDF è, assai impurtanti, da u presidenti naziunali d'EDF PEI (Pruduzzioni Elettrica Isulana). Si tratta in fatti di u rinnovu di a stallazioni di pruduzzioni elettrica di tuttu u rughjoni aiaccinu, chì faci parti di l'urientazioni ditarminati da a Prugrammazioni Pluriannuali di l'Energia pà a Corsica, chì devi pricisà i scopi di pulitica energetica è urientà i travaghji di l'attori publichi trà u 2016 è u 2023. Un arnesi industriali novu chì viaghjarà in un prima tempu cù u fuel lighjeru, è micca à u fuel pisivu, eppo dopu cù u gaz, quandu l'infrastrutturi pà u gaz sarani pronti. Custruitu vicinu à a cintrali attuali di u Vaziu, quissu quì pruduciarà meghju mentri chì i sfarenti emissioni sarani propiu limitati, un bunissimu affari à u nivellu ambientali. Un prughjettu chì dumandarà setti anni di rialisazioni, trà l'autorisazioni amministrativi è u spiazzamentu di l'industrii attuali, a custruzzioni trà u 2018 è u 2021 eppo i provi è a missa in serviziu prugressiva di i stallazioni trà u 2021 è u 2022. Dopu à tuttu què, u cantieru pà caccià a cintrali attuali di u Vaziu duvaria principià pà fassi annant'à sei anni. Ss'annunziu hè una vera bona nutizia ?
Dopu à Maria Guidicelli, steti à senta à Laurent Marcangeli, diputatu è merri d'Aiacciu.
