Centrale électrique de Corse-du-Sud : Ajaccio ou Bastelicaccia ?
30 milioni d'auri, eccu ciò ch'iddi custarani i studii ingagiati pà a ghjunta di u gasu in Corsica è par u rinovu di a cintrali di u Vaziu. Ramintemu chì issi studiii erani di prima impurtanza par chì EDF s'impegni in issu prugrama di prima trinca. A cumissioni di a rigulazioni di l'energia si hè dunqua ufficialmenti ingagiata à finanzà issi studii. I mezi sarani presi à nantu à a CSPE, a Cuntribuzioni à u Sirviziu Publicu di l'Elettricità, una cuntribuzioni fiscali ch'ugni clienti d'EDF paga. È issi mezi sarani dispunivuli prestu prestu dopu à l'aduzzioni, da l'Assemblea di Corsica, di a nova prugramazioni plurianninca di l'energia. Ferma in attesa, è ùn si ni sarà mancu parlatu mentri a visita lla ministra di l'energia, a scelta di u locu d'impiantazioni di a cintrali nova. S'idd'hè vera chì una cintrali à masuttu, nimu a voli à nantu à u so tarritoriu, ùn hè listessu affari par una cintrali à u gasu. Pulita, pocu cuntrastata da a pupulazioni, pò porghja rivinuti impurtanti à a cumuna d'accolta, parvia di u pagamentu di parichji tassi. Aiacciu o Bastilicaccia ? Pari avè a mani a cità impiriali, cù una ricustruzzioni à nantu à u situ di l'attuali Vaziu. Una pussibilità ch'ùn dispiaci à a mirria d'Aiacciu.
Marie Antoinette Santoni-Brunelli, consiglieri tarrituriali è municipali d'Aiacciu
