Chambres d'agriculture ponctionnées par l'Etat : les agriculteurs ne se laisseront pas faire
(A redazzioni d'Alta Frequenza) - N’emi dighjà parlatu, una riunioni di crisa hè stata urganizata ssu marcuri in camara d'agricultura di Corsica Suprana à l'uccasioni di una ghjurnata à porti sarrati com'è inde tutti l'altri camari d'agricultura. In fatti, u Statu, in leia cù ciò chì era statu fattu cù i camari di cummerciu, hà da prilevà, annant'à trè anni, 90 millioni d'auri ind'u so capitali di funziunamentu di tutti i camari chì contani più di 90 ghjorni di capitali di funziunamentu dispunibuli. A camara di Corsica Suprana t'hà appena di più di 250 ghjorni di capitali di funziunamentu è sarà dunqua tocca da ssa misura in u 2015 cù guasgi dui millioni d'auri chì sarani prilevati. Una scimità pà a camara d'agricultura chì sarà ubligata à truvà soldi pà pudè culmà ssa mancanza, o tandu u so funziunamentu è ancu l'impiegu ind'u casu u più pessimu cunnosciarani cunsiquenzi. È mentri chì Stéphane Le Foll, u ministru di l’Agricultura, devi ghjunghja in Corsica à a fin di u mesi, Ghjaseppu Colombani, u presidenti di a camara righjunali d’agricultura ripighja senza prublema u so rollu di sindicalistu pà pudè lampà un missaghju à u Statu. L’agricultori, s’elli duviani essa lacati da cantu, sò pronti pà u cunfrontu è l’azzioni.
Steti à senta à Ghjaseppu Colombani.
