Charte de la Collectivité Unique : les départements tapent du poing sur la table
(A redazzioni d'Alta Frequenza) - Missa sottu tutela. A sprissioni hè forti ed hè stata aduprata da i dui presidenti di cunsighji dipartimintali ssu marcuri duranti una cunfarenza di stampa. In fatti, ssu ghjovi, una cartula nant'à a Cullittività Unica devi essa asaminata è vutata da l'Assemblea di Corsica, una cartula trà a CTC è i dui dipartimenti. À i dipartimenti ghjustu appuntu, li si pari di subiscia ssa cartula di più cà d'avecci participatu. Pierre Jean Luciani, u presidenti di u Cunsighju Dipartimintali di Corsica Suttana, com'è u so cullegu di Corsica Suprana, François Orlandi, t'ani a paura d'essa missi da cantu, cù scritti è neguziazioni fatti solu trà u Statu è a CTC. Ssa cartula, ch'elli ùn signarani micca tali è quali, privedi d'appressu à elli un'ingerenza troppu maiò di a CTC in a gistioni di i dipartimenti fin'è a nascita di a Cullittività Unica. È par elli, a CTC è l'Assemblea di Corsica devini fà un passu ver di i dipartimenti caccendu ssa cartula da u prugramma di u ghjornu.
Steti à senta à François Orlandi, u presidenti di u cunsighju dipartimintali di Corsica Suprana.
