Circulation : premiers résultats des enquêtes de terrain de la CAPA
(A redazzioni d'Alta Frequenza) - Ci sò troppu vitturi annant'à u tarritoriu di a Cumunità d'Agglumerazioni di u Paesi Aiaccinu. Ùn v'imparemi nulla dicenduvi ss'affari quì, ma hè infini u custatu di l'inchiesti di tarrenu rializati in fin d'annata scorsa cù 7 300 automobilisti. Inchiesti chì sò stati fatti ind'u quadru di a revisioni di u PDU, u pianu di spiazzamenti urbani è cù u scopu di cunnoscia bè l'abitudini di spiazzamenti annant'à a CAPA. Si custata di fattu chì ogni ghjornu, 63 000 veiculi entrini in Aiacciu, cù una media di 1,3 parsona in ogni vittura solu. Altru custatu : dopu à Alata è Afà, Purtichju hè a terza cumuna d'urighjini di i vitturi, mentri chì Aiacciu hè di sicura a prima cù 31,2%. Pà ciò chì tocca i mutivi di spiazzamenti, ùn c'hè quì dinò nisun supresa : a cunsumazioni è i dimarchji parsunali, andà à travaghjà o andà in casa soia tuttu simpliciamenti cumponini u podium è largamenti. À ssu studiu, nisun suluzioni hè arricata par avà, fora di pussibilità di travaghju pà a missa in ballu par asempiu di picculi trasporti marittimi tutta l'annata, u sviluppu di i trasporti in cumunu o ancu, ciò chì pari essa una di i suluzioni maiò, a mubilisazioni di u caminu di farru da Mezana fin'è u cori di a cità. A suluzioni ùn saria micca infini di cambià i mintalità di tuttu ognunu tuttu simpliciamenti ?
Steti à senta à Xavier Lacombe, u vici presidenti di a CAPA.
