Climat social tendu à l'URSSAF de Corse
(A redazzioni d'Alta Frequenza) - L'intersindicali CFDT-STC-CGT di i parsunali di l'URSSAF di Corsica hè in greva ssu ghjovi. C'hè stata un'adunita davanti à u purtoni di u stabilimentu in Aiacciu pà sustena un impiegatu chì hè à l'uspidali oghji. Eccu a situazioni d'appressu à l'intersindicali : dopu à una prucedura lanciata di ghjunghju scorsu da u direttori di l'URSSAF pà lampà fora u rispunsevuli di u serviziu di i liti par ùn avè micca agitu ind'a gistioni di dui cartulari di rimbursamentu, ciò chì hè cunsidaratu com'è un sbagliu, tutti l'istanzi cunsultati duranti a prucedura ani dittu ch'elli erani contru. Ma, dopu à ssa listessa prucedura, l'impiegatu ùn hà micca pussutu ritruvà u so postu, vistu chì u direttori ùn hà micca tinutu contu di a dicisioni di l'Ispizzioni di u Travaghju, è ch'ellu hà prupostu à l'impiegatu di falà di parechji nivelli ind'a ierarchia di l'impieghi, cù tutti i cunsiquenzi inghjinnati. Postu chì l'impiegatu ùn hà micca rispostu di manera pusitiva à "ss'ufferta", u direttori hà dicisu d'ingaghjà una nova prucedura pà lampallu fora; una dicisioni chì l'omu ùn hà micca pussutu suppurtà, assai toccu è oghji à l'uspidali dunqua. Dinunziendu di manera più glubali i metudi di management di ssu direttori in postu dipoi dui anni, i parsunali di l'URSSAF di Corsica dumandani a so partenza è di piantà subbitu subbitu a prucedura di disimpiegu. Da un'antra banda, un cunsighju d'amministrazioni di l'Agenza cintrali di l'urganisimi di securità suciali hè urganizata ssu ghjovi ; ssu cartulari pudaria essa amintatu.
Steti à senta à Louis Ducreux, u secretariu righjunali di a CFDT.
Sur le même sujet
