Cohabitation police-gendarmerie : les policiers de Corse en appellent à Bernard Cazeneuve
(A redazzioni d'Alta Frequenza) - L'intersindicali Corsica di i sindicati di pulizza faci sapè torna ch'ella ricusa di modu sanu è glubali u prughjettu di riforma - ULCOC - "micca efficaci è gattivu". Pà fà ricullà ssa scuntintezza, l'urganisazioni sindicali si sò aduniti arimani (marti) davanti i prifitturi d'Aiacciu è di Bastia. Ani datu dinò à u prifettu di Corsica una lettara aparta addirizzata à u ministru di l'Internu Bernard Cazeneuve. À u centru di u prublema, a cuabitazioni trà a pulizza è a gendarmeria annant'à l'inchiesti. Pà l'intersindicali "nisun riforma in Corsica hè efficaci è pò essa accittata s'ella ùn s'arremba micca à un bilanciu spartutu di a dilenquenza, un rispettu di a cumpetenza è di l'impegnu di i parsunali di i servizii [...] pà sbuccà annant'à una difinizioni nova è chjara di l'attribuzioni di i forzi di pulizza è di gendarmeria." È di dumandà à u ministru di pighjà una dicisioni. Ind'u filu di ssi rivindicazioni, i sindicati di pulizza ani dicisu di ùn participà micca à i riunioni di i CHSCT (cumitatu d'igieni è di securità) è di i CTD (cumitatu tennicu) di Corsica Suttana. In fatti, nisun discussioni annant'à a riforma ULCOC hè stata missa à u prugramma di ssi dui urganisimi d'appressu à i raprisintanti di i parsunali.
Sur le même sujet
