Collectivité unique : le CD 2B présent
(A redazzioni d'Alta Frequenza) - Gilles Simeoni è Ghjuvan Guidu Talamoni ani adunitu ssu marcuri da mani u cumitatu di cuurdinazioni in carica di travaghjà nant'à a futura Cullittività di Corsica, di manera più generica nant'à a cullittività unica. Una riunioni in dui tempi, prima solu cù l'eletti participendu à ssu cumitatu, eppo una riunioni più allargata aparta à i raprisintanti sindicali di i parsunali di i trè cullittività. S'hè dunqua studiatu l'avanzata di l'urdinanzi istituziunali è finanziarii, chì sò stati prisintati duranti a visita di Manuel Valls à u principiu di u mesi. S'hè parlatu dinò di a dumanda assai forti cuncirnendu ss'urganisazioni nova nant'à a gistioni di i risorzi umani. A prima parti di ssa ghjurnata s'hè passata senza a prisenza di u Cunsighju dipartimintali di Corsica Suttana, o in tutti i casi senza a so raprisintazioni pulitica, parchì i raprisintanti di i so parsunali erani bè prisenti pà a siconda parti di ssa riunioni. Pierre Jean Luciani s'era spiazzatu eppuru pà sustena, hà dittu ss'ultimu, i parsunali di u CD 2A. Dopu un discorsu cortu, si n'hè andatu da l'emiciculu è a riunioni hè cuminciata. Una rinioni chì si saria passata propiu bè, parchì tutti i parti prisenti ani pussutu scambià di manera apprufundita nant'à quistioni difficiuli. S'è i vicini di u Grand Hôtel ùn ani micca rispostu di manera pusitiva à l'invitu à participà à ssa riunioni, altri eletti aviani fattu u longu viaghju da Bastia o d'altrò par essa prisenti à ssa riunioni impurtanti. François Orlandi, u presidenti di u CD 2B, malgradu a sumiglia di ribellioni purtata calchì mesi fà contr'à ssa riforma, hà ghjudicatu ssi riunioni piuttostu pusitivi. Parchì ? Eccu ciò ch'è no l'avemi dumandatu.
Steti à senta à François Orlandi.
Sur le même sujet
