Collectivité unique : les attentes de la CFDT Corsica
(A redazzioni d'Alta Frequenza) - U dialogu suciali com'è mutori di una riforma tarrituriali riesciuta ! Eccu ciò ch'elli dicini a CFDT Corsica è i sindicati INTERCO di Corsica Suprana è Suttana, chì raprisentani in tuttu un terzu di l'agenti tarrituriali di i dui cunsighji dipartimintali è di a Cullittività Tarrituriali. Ani aspittatu u lindumani di l'appuntamentu in Parighji trà i ministri di l'Internu è di a Dicintralisazioni cù l'eletti di a Corsica pà pudè cumunicà, duranti una cunfarenza di stampa. Senza dì s'ellu hè pà o contr'à a criazioni in u 2018 di a cullittività unica, l'unioni sindicali rigretta chì par avà, ùn ci sighi stata nisun cuncertazioni cù i partinarii suciali. Una riforma pà i tarritorii, chì battissi à prò di l'agenti ma soprattuttu di l'usadori, eccu a brama di a CFDT Corsica, chì spera di veda sviluppati cosi cuncreti in materia di cuntinutu à ssa riforma da l'eletti. I parsunali sperani di fattu una visibilità à longu andà di a so situazioni, un avvena pà i missioni di i cullittività in sfarenti materii o ancu cunnoscia i cunsiquenzi finanziarii di a riforma annant'à l'ecunumia di i cullittività lucali è di manera più generali di l'isula.
Steti à senta à Antoine Filippi, dilegatu sindicali CFDT INTERCO 2B.
Sur le même sujet
