Communauté d'Agglomération de Bastia : vers une régie pour l'eau
(A redazzioni d'Alta Frequenza) - Ssu luni, à a vigilia di un cunsighju cumunitariu carcu, François Tatti, u presidenti di a Cumunità d’Agglumerazioni, hà prisintatu arrimbendusi à un raportu a scelta di a CAB chì hà da prupona ssu marti à l’eletti cumunitarii di batta à prò di u passaghju di a gistioni di l’acqua è di l’assanimentu à un funziunamentu in regia cumunitaria cù parsona murali à u 1a di ghjinnaghju di u 2016. Una scelta mutivata da l’impattu à longu andà annant’à i finanzi di u citadinu, postu chì induva u prezzu di l’acqua crisciarà di 2,8% in u 2016 è in tuttu di 10,5% da quì à u 2020, a suluzioni di dilegazioni di serviziu publicu avaria inghjinnatu una crescita putenti di u prezzu di l’acqua à partasi di u 2016. In fatti, appughjendusi annant’à a chjama à l’ufferti micca bona lanciata l’annu scorsu, l’ufferta di Véolia prividia una crescita di 12,2% di u prezzu di l’acqua à partasi di l’annu chì veni, è quilla di l’Uffiziu Idrolicu di a Corsica, dilegataria fin’è u 31 di dicembri, una crescita di 13,3%, cù +20% è +25% à l’avvena in u 2020 di manera rispittiva pà un’ufferta è l’altra. S’è u costu di a transizioni sarà di 700 000 auri à u minimu, in casu chì u cunsighju cumunitariu duvia fà ssa scelta, l’intaressu pà a CAB hè u fattu di ripighjà a maestria tutali di ssu duminiu impurtanti à longu andà, mentri chì tutti i parsunali di l’uffiziu idrolicu in carica di l’acqua è di l’assanimentu in ssu mumentu di a CAB sarani ripresi da a regia cù cundizioni suciali chì ùn cambiarani micca.
Steti à senta à François Tatti, u presidenti di a CAB.
