Communiqué du FLNC

(A redazzioni d'Alta Frequenza) - In un cumunicatu longu di quatordeci paghjini ghjuntu ind'a nostra redazzioni, u FLNC prisenta a so analisi di a situazioni ind'un mumentu chì li pari essa dicisivu pà a Corsica. L'urganisazioni clandestina ùn ci faci micca rifarenza, ma si pò pinsà chì ssa cumunicazioni ghjunghji in seguita à a pusizioni di sarratura annunziata da Manuel Valls calchì mesi fà, ditta torna calchì ghjornu fà da Bernard Cazeneuve è ripituta dopu, è parechji volti da u prifettu di Corsica. U FLNC faci un storicu longu di a storia di a Corsica dipoi u principiu di a lotta armata, chì hà limitatu sicondu ellu duranti un tempu longu a culunisazioni di pupulamentu è a betunisazioni di a Corsica. Ramenta ch'ellu hà sempri accumpagnatu l'avanzati istituziunali ch'ella hà cunnisciutu a nostra isula. Ramenta dinò u rolu cinicu di u Statu chì dipoi sempri hà ghjucatu l'uni contr'à l'altri". Malgradu ss'avanzati, "nimu ùn pò più creda à i calculi di i guverni successivi", cuntinueghja l'urganisazioni. U FLNC situeghja torna a piazza di a Corsica ind'una "mundialisazioni sprupusitata è un'Auropa diretta da a finanza è a dittatura di i marcati". "Ricusemi", dici ss'ultimu "ss'Unioni Aurupea di Stati custituiti chì negani u dirittu di i populi". L'urganisazioni clandestina volta annant'à "una fasa attiva di dialogu è di dicisioni" chì intaressa a Corsica dipoi più di trè anni. "Temi pruibiti tempi fà", cuntinueghja quissa quì, chì "tracciani a forma di una suluzioni pulitica", è di cità a lingua corsa, a fiscalità, u fundariu, una cumpagnia marittima corsa, u statutu di residenti, una revisioni custituziunali, sviluppu ecunomicu è suciali. U FLNC dici "ch'ellu ferma attenti di manera strema di pettu à u sistema chì tocca a sucità corsa com'è un cancaru". Faci rifarenza à certi reti maffiosi "chì poni essa strumintalizati di manera faciuli ind'una logica d'uppusizioni". "Un ciculu si compii", cuntinueghja ss'ultimu, "è hè ora di passà à una fasa nova, quilla di a custruzzioni di una forza pulitica pà guvernà a Corsica è purtalla sin'à l'indipendenza". Chjama dunqua i corsi "à raghjunghja l'insemi di i strutturi publichi chì si ricunnoscini ind'a nostra dimarchja storica". Par què, "senza cundizioni prima è senza ambiguità, a nostra urganisazioni hà dicisu di manera unilaterali di principià un prucedimentu di demilitarisazioni è una surtita prugressiva di a clandestinità. Ricusemi dunqua par avanza qualsiasi parternità d'azzioni militari annant'à u tarritoriu corsu è francesi".