Communiqué du FLNC
(A redazzioni d'Alta Frequenza) - Un annu dopu à l'annunziu di l'arrestu di a viulenza da u FLNC, l'urganisazioni clandestina, u ghjornu di a ghjunta in Corsica di u ministru di l'Internu, hà vulsutu fà una cumunicazioni nova. S'è, pà u FLNC, a ditarminazioni ferma a listessa, "a nostra scelta d'arimani hè a nostra scelta d'oghji", cundanna eppuru d'una manera assai sivera l'evuluzioni attuali di i cosi. "U Statu francesi", dici l'urganisazioni, "cuntinueghja à un pighjà micca in contu i rivindicazioni leghjittimi di u populu corsu, vutati eppuru demucraticamenti da l'assemblea tarrituriali". U custatu hè chjaru è dimostra bè, sicondu l'urganisazioni, ch'ella c'hè in Parighji in ssu mumentu nisun vulintà pulitica di risponda di manera pusitiva à i brami demucratichi di un populu. L'urganisazioni hè particularmenti inchieta di pettu à a "pulitica riprissiva" di u Statu è ferma assai attaccata à a dumanda d'annistia di i prighjuneri pulitichi è di i ricircati pà raghjoni pulitichi. L'urganisazioni accerta bè chì a lotta di u populu corsu cuntinuarà oramai in un quadru publicu, pupulari è demucraticu.
Sur le même sujet
