Compagnie maritime régionale : avis favorable du Conseil Economique Social et Culturel
(A redazzioni d'Alta Frequenza) - U Cunsighju Ecunomicu Suciali è Culturali di a Corsica hà datu ssu vennari un avisu favurevuli cuncirnendu dui raporti chì sarani prisintati ssu marti à l'Assemblea di Corsica : unu nant'à u studiu di scenarii di cumpagnii marittimi tarrituriali cù studiu in un prima tempu è l'altru cuncirnendu u ritornu di l'arnesi navali, tuttu què l'avareti capita in u scopu di crià a famosa cumpagnia marittima regiunali corsa grazia à un partenariatu publicu è privatu. A manera di gistiscia ritinuta da a maghjurità tarrituriali hè quilla di a criazioni di dui Semop, Sucità d'Ecunumia Mista cù Uparazioni Priuritaria, una pà i porti principali, l'altra pà i porti sicundarii, eppo una sucità d'investimentu. Dopu a seenza di u CESC di ssu vennari, a CFDT Corsica è u STC Marinari, à prò di u prughjettu di l'Esecutivu cù quali sò stati assuciati di manera stretta duranti i sfarenti discussioni, ani urganizatu una cunfarenza di stampa pà renda publicu l'avisu di ssa listessa entità à a vigilia di una sissioni di l'Assemblea di Corsica chì pudaria essa qualificata di storica à ssu nivellu quì. Hè u parè d'Alanu Mosconi, pà u STC di i Marinari, propiu cuntentu.
U stemi à senta.
