Compagnie maritime régionale : le STC persiste et signe
(A redazzioni d'Alta Frequenza) - Assemblea di Corsica. Senza parlà di a famosa "clause de revoyure", tinuta cara da i spicialisti di i quistioni di cuntratti publichi, omu hà dicisu quantunqua di ritruvà si di sittembri da trattà di u prublema difficiuli di u portu di Tulò. "A la longueur du pantalon on voit qu'il est de Toulon", dici u dettu pupulari, ma ùn hè micca lighjendu u raportu di l'Esecutivu ch'ellu s'hè pussutu veda spuntà a suluzioni da allargà nant'à u portu di u Var a dilegazioni di serviziu publicu maritimu. U dibattitu di vennari scorsu hà missu in fatti in risaltu una maghjurità larghissima di l'Assemblea di Corsica contr'à issa pussibilità, ciò chì laca priveda un dibattitu puliticu di prima trinca pà a riintrata. Ùn si sà s'è, com'è a notti, a statina porta à rifletta, ma di pettu à l'affirmazioni di i pusizioni, hè pocu pussibuli chì tuttu u mondu ci truvessi u so contu. Com'è l'emi ditta, i sindicati di salariati di i cumpagnii cuncirnati erini prisenti à l'uccasioni di issu dibattitu è ci ani datu u so sintimu, o ancu u so timori. A CGT di i marinari di a SNCM hà rilevatu bella sicura a prudenza strema di a maghjurità di manca di l'assemblea di Corsica chì, fora di u gruppu cumunistu, hà sustinutu issu raportu cà pochissimu. Pari chì issu dibattitu avissi cunfurtatu u STC ind'a so visioni di i futuri trasporti maritimi di a Corsica : a cumpagnia righjunali. Pocu fà, era sempri un sughjettu chì ùn ci vulia micca à trattà, o ancu una vera parullaccia, ma omu n'hà parlatu torna una volta à l'uccasioni di issu dibattitu.
Écoutez Alain Mosconi.
