Conférence de presse clandestine cette nuit en Corse
(A redazzioni d'Alta Frequenza) - Un novu muvimentu clandestinu corsu hà annunziatu a so criazioni stanotti (di luni à marti) à l'uccasioni di una cunfarenza di stampa urganizata ind'a machja, in calchì locu di Corsica Suprana. Issu muvimentu s'hè spressu sottu à u nomi di u "FLNC". "Noi, cumbattanti, militanti è rispunsevuli di tuttu u muvimentu naziunali, demi una parolla è una strutturazioni plurali à u Fronti di liberazioni naziunali di a Corsica" dicini iss'ultimi. Iss'urganisazioni nova, chì ùn hà micca vulsutu cumintà l'azzioni di l'altri gruppi clandestini, hà parlatu soprattuttu di a situazioni campata da a Corsica, custatendu chì l'isula vedi "una crisa pulitica, ecunomica, suciali è murali mai cunnisciuta à tal puntu". "Mentri chì a maghjurità s'impuvarisci, una minurità cuntinueghja ad arricchiscia si grazia à a speculazioni fundaria è immubiliari", ani spiecatu iss'ultimi. I clandestini ani dinunziatu dinò a speculazioni fundaria è immubiliari, "a sculturazioni di a lingua corsa", "a delinquenza campata da una parti di a ghjuventù com'è una prumuzioni suciali", "a cunsumazioni di droga", "u numaru d'assassinii mai vistu in Auropa in prupurzioni à a pupulazioni". I clandestini ani ammintatu dinò "u fiascu di a pulitica francesi d'integrazioni. Cù 6 000 parsoni novi ghjunghjendu da fora à l'annu è un sciffru di disimpiecu di 15%, l'isula n'hè ghjunta oramai à a so limita d'accolta". U FLNC hà dichjaratu dinò ch'ellu "t'hà vucazioni à spariscia" ancu puru s'è "i guaranzii, par avà, ùn sò ancu riuniti. Faremi di modu à cuntribuiscia à crià dumani i cundizioni di surtita di crisa, purtatrici di una paci durevuli è micca un'armata contr'à u Statu francesi o d'altri Corsi". U FLNC hà compiu a so cumunicazioni adirizzendu si à François Hollande, presidenti di a Republica francesi. U FLNC li dumanda d'ingaghjà si nant'à parechji punti : "ricunniscenza ufficiali di u fattu culuniali francesi in Corsica, apartura di un prucidimentu parmittendu à u populu corsu d'appiecà i so diritti, di una revisioni custituziunali par avè mezi strutturali è ghjuridichi dendu à i Corsi l'ammaistranza demugraffica, fundaria è ecunomica : citadinanza corsa, codici di l'investimenti, statutu ufficiali di a lingua corsa, libarazioni di tutti i prighjuneri pulitichi corsi".
