Conseil constitutionnel et Arrêtés Miot : de nombreuses réactions et propositions
(A redazzioni d'Alta Frequenza) - A fiamma di u cunsighju custituziunali accesa u 30 di dicembri pudaria fà, fora di u ghjiru di Francia, è di manera menu fistiva, l'altru avenimentu di l'annu 2013; è tuttu ognunu a sà, chì in Corsica fochi maiò si poni sviluppà ancu fora di a statina. Ùn semi cà à u principiu di a rivolta. A Lega di i Diritti di l'Omi hà vulsutu riagiscia à a dicisioni di u cunsighju custituziunali ind'un cumunicatu. Pà a LDH, saria ora di scriva a Corsica ind'a custituzioni, parchì pà sorta, pensa iss'ultima, di u pruvisoriu è di u dirugatoriu, ci voli chì a quistioni fiscali sighi dibattuta ind'u quadru di un veru prughjettu di sucità. Petru Poggioli, ancu ellu, ci và cù a manera. L'anzianu rispunsevuli di u FLNC, stima chì si tratta di l'ultima uffesa contr'à a Corsica è i corsi ind'u scopu di metta in ballu a scursisazioni. Issa misura, dici Petru Poggioli, hà da accelerà a sparizioni di u populu corsu è di i so diritti sicuri nant'à a so tarra. Pruponi a missa in ballu à lestra di una cuurdinazioni pà un statutu fiscali chì adunisciaria tutti i forzi pulitichi, sindicali, socioprufessiunali è assuciativi di l'isula pà urganizà a riazzioni. Riazzioni dinò di u gruppu Corse sociale démocrate di l'assemblea di Corsica; Antoine Orsini hà travaghjatu assai, cù Pierre Chaubon, nant'à u prughjettu di novu statutu di l'isula. Ni ghjunghji infini à a listessa cunclusioni, chì fora di un novu statutu, micca statutu.
Ecoutez Antoine Orsini.
