Conseil départemental 2A : une affaire de famille qui tourne mal
(A redazzioni d'Alta Frequenza) - S'è u libecciu soffia soprattuttu in timpesta in Corsica Suprana, è in Bastia in particulari, ùn hè micca statu u casu oghji postu chì u timpurali hà toccu Aiacciu è u Palazzu Lantivy. 11 è 11, faci di regula 22, eppuru ss'11 quì ùn si sò micca aghjustati à l'11 altri, ciò chì hà criatu tinsioni duranti l'alizzioni di u presidenti di u cunsighju generali. 11 pà Jean Jacques Panunzi in fatti è 11 pà Marcel Francisci : i dui sciffri sò vultati tutta a ghjurnata, mittendu in evidenza sempri a stessa logica, ùn c'hè micca maghjurità ind'u cunsighju suttanacciu. Peghju, quilli chì torna calchì ghjornu fà si basgiavani in bocca pà fistighjà i successi eletturali à a fila, si sò rivultati pà pudè metta in risaltu un divorziu oramai sicuru. L'arrigulamentu naziunali di i cullittività s'imponi à l'arrigulamentu internu di u dipartimentu pumuntincu ? S'hè parlatu di què tutta a ghjurnata. A risposta hè sicuramenti "iè", ma prublema : hè solu u tribunali amministrativu chì a pudarà dì, ed hè ciò chì si duvaria passà da quì à calchì ghjornu. U novu presidenti suttanacciu, dopu à tanti evenimenti a mani, ùn hè nè Jean Jacques Panunzi, nè Marcel Francisci. U disaccordu prufondu hà ubligatu l'uni è l'altri à prisintà dui candidaturi novi chì ani inghjinnatu l'alizzioni di Pierre Jean Luciani. A seguita di l'evenimenti ùn hè micca cusì simplici chì Pierre Jean Luciani a dici, parchì i cosi ani presu un versu torna più pessimu duranti u dopu meziornu. A squadra Francisci hà fattu un passaghju in forza, ciò hà annarbatu Jean Jacques Panunzi.
Steti à senta à Jean Jacques Panunzi, anzianu presidenti di u cunsighju dipartimintali di Corsica Suttana.
Sur le même sujet
