Conseil Exécutif de Corse : Manuel Valls réagit à l'élection de Gilles Simeoni
(A redazzioni d'Alta Frequenza) - In un cumunicatu publicatu annant'à u situ internet di u Guvernu, Manuel Valls hà riagitu à l'alizzioni di Gilles Simeoni à u capu di l'Esecutivu di Corsica. Ecculu sanu : "U Primu ministru, Manuel Valls, hà chjamatu Monsieur Gilles Simeoni pà filicitallu dopu a so alizzioni à a presidenza di l'esecutivu di a Cullittività tarrituriali di Corsica. L'hà assicuratu di a dispunibilità di u Guvernu pà cuntribuiscia à u sviluppu ecunomicu di l'isula par asempiu in u quadru di l'ingaghjamenti di u prugramma eccezziunali d'investimentu. Hà accertatu torna dinò chì a securità in Corsica firmava una priurità di u Guvernu. U Primu ministru hà fattu cunnoscia torna a so attaccatezza à a piazza di a Corsica in a Nazioni è in a Republica francesi è a so ricunniscenza di a specificità di l'isula. L'hà assicuratu chì u guvernu hà da cuntinuà à dialugà cù l'eletti di a Cullittività tarrituriali di Corsica pà metta in opara l'evuuzioni statutarii ver di a cullittività unica com'elli sò privisti da a legi. Ani cunvinutu di cuntinuà un dialogu sirenu, custruttivu è appaciatu. U Primu ministru è u Presidenti di l'esecutivu di a Cullittività tarrituriali di Corsica si scuntrarani da quì à pocu pà asaminà tutti i sughjetti cumuni. U Presidenti di l'esecutivu di a Cullittività tarrituriali di Corsica hà da participà dinò à u scontru chì u Presidenti di a Republica è u Primu ministru ani da urganizà di ghjinnaghju cù tutti i presidenti di regioni."
Sur le même sujet
