Conseil municipal de Bastia : un incident prémédité pour Gilles Simeoni
(A redazzioni d'Alta Frequenza) - C'hè statu calchì evenimentu duranti a seenza di u cunsighju municipali di Bastia di ssu marti. Mentri ch'ellu si passava senza prublema cù un accunsentu annant'à tutti i cartulari guasgi, è dibattiti curtesi, u cartulari di u prugramma pà a migliurazioni di l'alloghji è di a rinnuvazioni urbana hà fattu cullà subbitu subbitu a timperatura. In fatti, l'uppusizioni hà fattu rimarcà ch'elli asistiani dui virsioni di u raportu, cù una o dui infrasati chì cambiani annant'à un tutali di 44 paghjini, ma l'infrasata cambiata trà i dui virsioni rimittia in causa tuttu d'appressu à ella. S'è ind'a prima, i parkings Gaudin è di u Puntettu erani citati di manera pricisa com'è fendu parti di u prughjettu cù un numaru di piazzi bè difinitu, a siconda amenta parkings studiati ind'u quartieru, senza pricisà u locu nè a capacità. Gilles Simeoni, rispundendu à l'uppusizioni, hà stimatu chì ssu picculu cambiamentu ùn cambiava micca a capacità di a cità di sceglia una o l'altra suluzioni postu chì ssi parkings ùn sò micca ubligatorii da un puntu di vista cuntrattuali ind'a so difinizioni prima ind'u quadru di a cunvenzioni cù u Statu. Di pettu à a dicisioni di u merri di fà un votu pà a siconda virsioni, micca ricivuta da tutti sicondu l'uppusizioni, ss'ultima hà dicisu d'ùn micca vutà è d'andassini, cù scambii di parolli putenti trà cunsighjeri municipali di l'uppusizioni è una parti di u publicu à quali era rimpruvaratu calchì rimarca ditti troppu forti par essa intesi duranti u cunsighju. Pà Gilles Simeoni, ss'evenimentu hè statu appruntatu d'appressu à ellu da un'uppusizioni chì si pò arrimbà solu à ssa manera di fà pà pudè upponasi.
Steti à senta u merri di Bastia.
Sur le même sujet
