Convention Etat-CTC pour l'enseignement du corse : le sentiment de Saveriu Luciani
(A redazzioni d'Alta Frequenza) - Si parla torna di a signatura ssu marcuri in u Grand Hôtel di a cunvenzioni Statu-CTC 2016-2021 nant'à u pianu di sviluppu di l'insignamentu di a lingua corsa. Ramintemi ch'ella prisenta dui assi maiò : a generalisazioni prugressiva di l'insignamentu bislinguu da a scola materna è l'integrazioni di a lingua è di a cultura corsa à tutti i nivelli d'insignamentu è di furmazioni. Un pianu di 17 millioni d'auri nant'à cinqui anni, finanziatu à parità da u Statu è a Cullittività tarrituriali di Corsica. L'innuvazioni maiò di ssa cunvenzioni hè l'elaburazioni è a missa in ballu di un pianu eccezziunali di furmazioni di 700 insignanti, lanciatu dipoi a riintrata 2016, in u prima gradu. S'è ssu ducumentu hè accoltu d'una manera abbastanza pusitiva da l'Esecutivu, ss'ultimu t'hà ben intesu scopi torna di più ambiziosi cù un metudu propiu uppostu di pettu à quillu vulsutu da u Statu, vali à dì fà torna di u corsu una lingua sucitali grazia à a missa in ballu di un statutu di cuufficialità.
Steti à senta à Saveriu Luciani, cunsighjeru esecutivu in carica di a lingua corsa.
