Coupure d'eau à Ajaccio : seuls trois établissements scolaires fermés vendredi
(A redazzioni d'Alta Frequenza) - Tagliatura d'acqua in Aiacciu : ci sò cambiamenti pà ciò chì cuncerna i sarraturi di i stabilimenti sculari. In un cumunicatu, u rettori d'accademia di Corsica stima di fattu chì "dopu à i pricisioni arricati arisera da a municipalità d'Aiacciu, si vedi oramai chì solu certi settori di a cità pudariani essa cuncirnati, è què, solu pà i casi à più di 50 metri d'altitudina". È d'aghjustà chì "u Prima aghjuntu di a cumuna s'hè ghjiratu ver di l'autorità accademichi pà fà sapè chì i scoli è i stabilimenti di a cità ùn sarani micca tocchi da prublemi d'alimentazioni d'acqua, fora di u culleghju è di u liceu Letizia, di a scola di u Loretu è di l'EREA. Grazia à ssa guaranzia è pighjendu in cunsiderazioni ss'elementi novi, cunsidareghju chì a misura di sarratura di i scoli è di stabilimenti sculari, presa arimani in fin di matinata, devi essa rivista". U rettori d'accademia compii dicendu chì "i scoli è i stabilimenti sculari d'Aiacciu accugliarani bè i sculari, ssu vennari u 13 di marzu di u 2015, fora di u culleghju è di liceu Letizia Bonaparte, di a scola di u Loretu è di l'EREA".
Sur le même sujet
