Crise des déchets : la CAB adopte le protocole dans la douleur
(A redazzioni d'Alta Frequenza) - C'era ssu marti u cunsighju cumunitariu di a Cumunità d'Agglumerazioni di Bastia. È à mezu à i cartulari trattati, quillu di u protocollu annant'à u cambiamentu di mudellu di gistioni di i rumenzuli in Corsica, sottumissu da u cumitatu di seguitu di Prunelli di Fium'Orbu è di Vighjanellu. S'è a necessità di truvà suluzioni in furia è, s'ella hè pussibuli, durevuli, hè scumpartuta da tutti l'eletti, ss'adesioni à u protocollu hè stata dibattuta annant'à dui punti da eletti chì facini parti di a maghjurità bastiaccia, cù com'è leader u merri di Bastia, Gilles Simeoni. U prima puntu di spiccanza hè statu l'incertezza cuncirnendu u costu di certi misuri bramati, u sicondu annant'à a custruzzioni di u centru di scumpartimentu meccanicu è biologicu di Tallone, ghjudicatu com'è senza cuerenza cù i scopi di scumpartimentu selettivu è com'è pudendu apra a porta à uparatori privati è à i so svianzi. Infini, mentri chì a ministra di l'Eculugia Ségolène Royal hà da pona un amendamentu davanti à l'Assemblea Naziunali par chì u centru di TMB sighi custruitu aghjustendu un'eccezzioni à a legi liturali, u protocollu hè statu vutatu da a maghjurità di i cunsighjeri cumunitarii, i cunsighjeri di a maghjurità bastiaccia pà contu soiu ùn ani micca participatu à ssu votu. Un affari chì faci nascia l'amarezza in François Tatti, u presidenti di a CAB ma dinò di u SYVADEC.
U stemi à senta.
