CTC: il n'y a pas encore le feu en la demeure budgétaire territoriale
(A redazzioni d'Alta Frequenza) - L’urientazioni bughjettarii pà l’annu 2014 – u dibattitu chì appronta un antru dibattitu, quillu di u votu di u bughjettu pà l’annu chì veni – s’hè tinutu arimani (ghjovi) à l’Assemblea di Corsica. Com’è sempri in materia di bughjettu, ci voli à arrizzà si à bon’ora cù l’idei propiu chjari pà suvità ssu gennaru di discussioni sempri assai difficiuli pà quilli chì ùn sò micca avvezzi. Vistu chì ci voli à vulgarizà, emi ritinutu ssi caratteristichi di u bughjettu pà 2014. Cù una calata di ciò ch’ellu dà u Statu – menu 4 millioni d’auri – una calata di a fiscalità lucali – fora di u tabaccu – è una calata dinò pà l’aiuti aurupei – ùn femi più parti di i rughjoni priuritarii oramai – ùn si pò micca dì chì à u nivellu di i rintrati l’affari sighi strasurdinariu. Ancu di grazia ci hè sempri l’ultima parti di u PEI – una riserva di 50 millioni d’auri – chì parmetti di tena l’investimentu à u nivellu curettu. Pà uttena l’equilibriu bughjettariu, ci voli à riducia dunqua à tutti i patti i spesi publichi malgradu u carattaru particulari di certi di ssi spesi quì, i spesi di parsunali par asempiu o ancu a debbita chì ci voli à rimbursà daveru. Pà Paul Giacobbi, chì hà spiecatu duranti un tempu longu u so prughjettu di bughjettu arimani, ùn ci hè ancu u focu ind’a casa bughjettaria tarrituriali ma a prudenza a più maiò devi essa prisenti.
Steti à senta à Paul Giacobbi.
Sur le même sujet
