Cuves de gaz du Loreto: satisfaction pour Simon Renucci
(A redazzioni d'Alta Frequenza) - A Cità d'Aiacciu - n'emi dighjà parlatu ind'i nostri primi nutiziali di a matinata - hà firmatu un protocollu d'accordu cù u Statu è GDF Suez. Ind'u quadru di l'elaburazioni di un novu pianu di privenzioni di i risichi tennulogichi i sferi giganti di gaz di Loretu s'ani da trasfurmà ind'una spezia di sigari chì sarani pà a maiò parti sottu tarra. A canalisazioni di gaz chì ghjova à u situ di i Salini è chì avia inghjinnatu parechji inchietudini tanti anni fà, sarà rinnuvata di modu sanu. A Cità d'Aiacciu vinciarà un benefiziu impurtanti cù ss'uparazioni parchì ci sarà di più securità è dunqua una riduzzioni cunsiquenti di u famosu perimetru "SEVESO". Ssa riduzzioni di a zona di prutezzioni parmittarà d'apra à l'urbanisazioni à pocu pressu 300 à 400 ettari è di lancià infini in più di què u pezzu di a rocade dittu Alata-Vittulu. Simon Renucci hè ancu di più cuntentu chì ss'uparazioni ùn custarà nulla à a Cità d'Aiacciu.
Steti à senta u merri d'Aiacciu.
Sur le même sujet
