Cyrénée: et pourquoi pas le train ?
(A redazzioni d'Alta Frequenza) - U Galsi, hè finita, Cyrénée hè forsa leccu! N'avemi dighjà parlatu arimani cù u resu contu fattu da François Alfonsi. Quissu quì in fatti s'hè avvicinatu da u ministeru di l'ambienti è pari chì l'infurmazioni ch'ellu hà intesu sighini piuttostu boni, pà ciò chì tocca a ghjunta di u gaz naturali in Corsica. L'associ contr'à i cintrali à u fuel, è par asempiu A Sintinedda, pensani chì u prughjettu di u cunduttu di gaz trà Bastia è Aiacciu hè intarratu di manera difinitiva è chì ci voli à ghjirà si dunqua oramai ver di un antru modu di trasportu. A Sintinedda pruponi ciò chì saria in altrò calcosa d'evidenti pà traspurtà ssu gaz: u trenu tuttu simpliciamenti. L'infrastruttura asisti dighjà, passa à calchì centinaia di metri di i dui siti di Bastia è d'Aiacciu, i CFC t'ani dighjà mezi di trazzioni nicissarii, mancariani solu calchì wagons pà u trasportu di u gaz è di pona calchì centinaia di metri di cunduttu. Pudaria essa rializatu in calchì settimana, daria à i CFC u fret chì li manca è saria di sicuru menu caru cà un gazoduc. Una pruposta ancu di più pertinenti postu chì EDF avaria dighjà studiatu l'idea di un trasportu di gaz pà a strada, rimpiazzendu u prughjettu Cyrénée.
Steti à senta à Dominique Lanfranchi, pà l'Associu A Sintinedda.
Sur le même sujet
