Débat d'orientations budgétaires de la CAB : l'opposition défend avec vigueur son bilan
(A redazzioni d'Alta Frequenza) - Semi in tempi d'alizzioni, ma dinò à u mumentu induva i cullittività mettini in ballu u so bughjettu, ch'elli duvarani prisintà da quì à pocu. Ind'a Cumunità d'Agglumerazioni di Bastia, un sbilanciu di più di setti millioni d'auri duvarà essa colmu. Sciffri chì sò stati amintati a sittimana scorsa duranti u dibattitu d'urientazioni bughjettarii. È l'affari hà da essa difficiuli. S'è trè millioni, o ancu cinqui ind'u casu u più bonu, pudarani essa riguarati da riintrati privisti, trè altri millioni duvarani essa colmi da altri mezi. Ed hè u pinseru di l'esecutivu di a CAB. François Tatti, chì hà dinunziatu cù forza a gistioni di a CAB da l'anziana maghjurità, parlendu d'investimenti micca bè finanziati, di spesi di funziunamentu mancu appena à paru o di a svianza di a ZAE d'Erbaghjolu, hà amintatu, par asempiu, a riduzzioni putenti di l'investimenti. Dinò, una crescita di a fiscalità annant'à i rumenzuli faci parti di i pussibilità amintati da François Tatti, di pettu à una situazioni qualificata di catastrofica, certi, com'è Jean Louis Milani, amintendu ancu una pussibilità di veda a CAB essa inquadrata s'è nulla ùn hè fattu à cortu andà pà i finanzi. Usservazioni assai cuntistati da l'anziana maghjurità, pà quali u bilanciu di l'ultima mandatura hè bonu, parlendu ancu di soprapiù in certi duminii.
Steti à senta à Jean Zuccarelli.
