Déchets : Ségolène Royal renvoie les élus corses devant leurs responsabilités
(A redazzioni d'Alta Frequenza) - U prublema difficiuli di u trattamentu di i rumenzuli hè statu amintatu ssu marcuri dopu meziornu à l'Assemblea naziunali. In fatti, duranti a seenza di i dumandi à u guvernu, u diputatu di Corsica Suprana Paul Giacobbi hà interpellatu a ministra di l'Eculugia, Ségolène Royal. Hè vultatu annant'à l'amendamentu à a legi liturali ch'ella avia prupostu di prisintà a ministra pà pudè custruiscia un centru di scumpartimentu meccanicu è biologicu in Tallone, prima di cambià d'avisu in fin di contu. S'è l'arrigulamentu di ssa crisa tocca à i puteri publichi lucali, ùn si pudarà risolva malgradu tuttu di una bella manera senza una cullaburazioni stretta cù u Statu, hà incalcatu Paul Giacobbi chì hà dumandatu à Ségolène Royal di cunfirmà què davanti à i parlementarii. A ministra di l'Eculugia, chì paria abbastanza annarbata, hà rinviatu l'eletti lucali davanti i so rispunsabilità è à truvà altri suluzioni in leia cù a legi di transizioni energitica. Ségolène Royal hà dittu cù forza chì ùn ci saria micca derugazioni à a legi liturali, postu chì l'amendamentu ùn hà micca pussutu essa vutatu par via di un'assenza di maghjurità parlementaria, senza scurdassi di criticà ghjustu appuntu i diputati corsi.
Steti à senta à Ségolène Royal.
Sur le même sujet
